Ir ao contido

Innovación e tradición

Innovación e tradición educativa

Un centro ambidextro

Desde hai anos, o noso colexio atópase inmerso nun proceso de transformación. Non o entendemos como a substitución total do que faciamos ata agora, senón como un proceso de actualización: queremos ser un centro ambidextro, no que conviven o mellor da metodoloxía tradicional coa innovación.

Seis liñas de Infantil a Bacharelato

Apostamos por infusionar a proposta educativa: as seis liñas de innovación concrétanse en plans, proxectos e iniciativas en todas as etapas.

Aprendizaxes activas

Enriquecemos o currículo con tarefas integradas e proxectos orientados a un traballo competencial.

En equipo

Organizámonos en equipos cooperativos e colaborativos.

Competencia lecto-escritora

Convencidos de que a lectura e a escrita son fundamentais para o éxito académico.

Ferramentas dixitais

Nunha contorna de aprendizaxe híbrida que non esquece o lapis e o papel.

Centro plurilingüe

En castelán, galego, inglés e francés: plurilingües en Primaria e bilingües na ESO.

Educa co corazón

Traballando as competencias emocionais do alumnado e acompañando o seu benestar.

Mans de alumnado debuxando con rotuladores na aula

Aprendizaxes activas

Enriquecemos o currículo con tarefas integradas e proxectos. O obxectivo non é acumular coñecemento, senón empregar os coñecementos e competencias para resolver tarefas ou proxectos, nos que o alumnado exerce un rol activo e protagonista e pode experimentar un éxito real.

  • Aprendizaxe manipulativa en Infantil.
  • Tarefas integradas por competencias: dende situacións cotiás ata a creación de produtos culturais.
  • Proxectos de materia, interdisciplinares e de curso, enfocados a un obxectivo maior.
  • Aprendizaxe-servizo: propostas de voluntariado, moitas delas co Centro Xuvenil Abertal.
Alumnado de Infantil traballando en equipo arredor dunha mesa

En equipo

Apostamos pola aprendizaxe cooperativa e a colaborativa, ambas baseadas no traballo en equipo. Na colaborativa o alumnado ten máis autonomía e deseña a súa estrutura de interacción; na cooperativa, o docente estrutura e controla as interaccións e os resultados.

Empregamos o modelo de aprendizaxe cooperativa de David W. Johnson e Roger T. Johnson: dende Infantil a Secundaria o alumnado organízase en equipos base, nos que se traballan habilidades sociais e métodos de aprendizaxe diversos.

Alumnado lendo na biblioteca do colexio

Competencia lecto-escritora

A lectura e a escrita resultan fundamentais para o éxito académico. O despregamento tecnolóxico non pode realizarse á conta da comprensión ou dos hábitos de lectura, senón poñerse ao seu servizo. Por iso a procura, selección e procesado da información é un núcleo do noso proxecto lector.

  • A biblioteca escolar como espazo dinamizador da lectura.
  • Un programa de prerrequisitos lectores en Infantil.
  • A dinamización da lectura a través dos contos e contacontos.
  • A hora de lectura: diaria en Primaria e semanal en Secundaria.
  • O caderno de escrita, de Primaria a Bacharelato.
  • A radio escolar, como espazo de publicación de tarefas e proxectos.
Man dun alumno tecleando nun portátil

Integrando as ferramentas dixitais

As tecnoloxías teñen algo de marabilla e algo de ameaza, e iso obríganos a situalas na súa xusta medida: para nós as TIC son unha ferramenta, fundamental e suxestiva, ao servizo dunha nova pedagoxía.

  • iPads en Infantil e Primaria.
  • Google Workspace for Education dende 4.º de Primaria ata Bacharelato.
  • Chromebook 1×1 de 5.º EP a 4.º ESO, nunha metodoloxía híbrida na que o lapis e o papel non desaparecen.
  • Pensamento computacional: robótica en Infantil e Primaria, Scratch en Secundaria, Python, C++ e Arduino en Secundaria e Bacharelato.
  • Deseño gráfico (Tinkercad e software libre) e deseño web en Secundaria e Bacharelato.

Todo isto articúlase en proxectos e tarefas, na materia de TIC (4.º EP, 4.º ESO e Bacharelato) e na de Tecnoloxía (1.º e 3.º ESO).

Nun centro plurilingüe

O obxectivo é que o alumnado acade a máxima competencia en castelán, galego e inglés, e despois o contacto cunha segunda lingua estranxeira, o francés, en Secundaria e Bacharelato.

Infantil

  • Dúas sesións semanais en inglés.
  • Contacontos e Bos Días en inglés.

Primaria plurilingüe

  • Arts and Crafts en inglés de 1.º a 6.º, cun lector na aula.
  • Bos Días en inglés os venres.
  • Halloween, Christmas, Saint Patrick e Easter.
  • Inmersión lingüística dunha semana nun país anglófono.

Secundaria bilingüe e Bacharelato

  • Obradoiro de música en inglés en 1.º, 2.º e 3.º ESO.
  • Francés optativo dende 1.º ESO a 2.º de Bacharelato.
  • Horas de lectorado en inglés e francés.
  • Inmersión lingüística dunha semana nun país anglófono.

Que educa co corazón

No cerne da pedagoxía salesiana atópase o Sistema Preventivo, que se apoia en tres piares: razón, relixión e amor. Porque, en palabras de Don Bosco, «a educación é cousa do corazón». Por iso poñemos a educación emocional no centro: un ambiente emocionalmente seguro que favorece o acompañamento persoal, e actividades no currículo para desenvolver as competencias emocionais. Traballamos:

  • Conciencia emocional: recoñecer as emocións propias e as dos demais.
  • Regulación emocional: responder de forma axeitada ás propias emocións.
  • Competencia social: habilidades sociais que facilitan as relacións interpersoais.
  • Habilidades de vida para o benestar: hábitos, valores e actitudes que contribúen ao benestar persoal e social.
WhatsApp