Como cada ano, achégase unha das datas máis especiais para a nosa comunidade educativa. O noso patio prepárase para encherse de xogos, música, ledicia e moita vida! Volve a festa e, con ela, a ilusión de celebrar xuntas e xuntos eses días que fan tan grande a nosa Obra Salesiana.

O vindeiro venres 22 de maio gozaremos da nosa gran Festa Colexial, unha xornada chea de alegría e convivencia pensada para todo o alumnado, familias e demais persoas que desexen vir visitarnos e pasar un anaco inesquecible.

Durante estes días teremos unha programación chea de vida e pensada para todas as idades:

🔹 Diversión para o alumnado: Estes días non faltarán as saídas pola cidade (ao Castro e ao Parque de San Roque), os torneos deportivos en Balaídos para os máis maiores, a nosa divertida ximcana “Xogamos con María”, o xa clásico Got Talent escolar e, como non, a sempre esperada Festa da escuma!

🔹 A Gran Festa Colexial no Patio (Venres 22): Pola tarde abriremos as portas para toda a comunidade. Teremos xogos da ANPA con sorteos, barracas, inchables, obradoiros de henna e maquillaxe, a trepidante proba de «Misión Imposible» e o espazo xuvenil de Alternativa Vaivén e Abertal.

🔹 Moita música e ritmo: A festa estará amenizada pola Minidisco Gran Barafunda para os máis pequenos. Ademais, gozaremos do talento musical do noso alumnado cos concertos en directo dos grupos Crash Cowbell e The Ceiling, e remataremos a xornada cunha gran sesión DJ!

🔹 Momentos para a emoción e a fe: Nestas festas tamén hai espazo para os encontros máis emotivos, como a graduación do noso alumnado de 2º de Bacharelato, as celebracións da Novena e, por suposto, o noso Día Grande: o 24 de maio. Ese día culminaremos as festas coa Misa Solemne presidida polo Sr. Bispo e a posterior procesión de María Auxiliadora polas rúas do barrio.

Será un tempo para gozar, compartir e celebrar en familia. Porque a festa é ledicia, encontro, comunidade… é Salesianos!

Agardámoste co corazón aberto e o patio cheo de maxia! 🥰🥳